Oleh : Nurjannah Usman
Ulon mulai deungon bismillah
Ngon kheundak Allah nazam lon uke
Keu masalah khueng jinoe lon kisah
Rakan meutuwah bak kayee mate
Ujeuen tan jitoh tanaman jih grah
Lam apoh apah seu-uem bukon le
Takalon naleung karab beh mirah
Binatang punah kadang dalam gle
Nasyit beurita na nyang gop peugah
Mata ie tho crah hana ie jile
Nyan ban seu-uem sang batee beukah
Rakan meutuwah jaga bohate
Geutanyoe hudep lam apoh apah
Lam reu-oh reu-ah seu-uem bukon le
Peulom nyang keurja dalam uroe grah
Lagee bang Dolah jak pula pade
Keurja bangunan han peu tapeugah
Abeh ie mirah geujeb meu saboh bate
Kareuna seu-uem sang-sang bumoe crah
Badan pih gogah saket duem sare
Na nyang batok lam reukueng han glah
Na syit nyang payah ba keudeh u igede
Seu-uem ngon badan aneuk miet mirah
Hate geu sosah bunda bohate
Uleh seubab nyan rakan meutuwah
Jaga ibadah tiep uroe sabe
Efek nyan bala geujok le Allah
Kadang meutuwah tanyoe lam jahe
Tajaga tuboh bek roh lam salah
Jaga meutuwah bungong sitangke
Tajaga aneuk bek salah langkah
Peureunoe ukhuwah agama cara seumike
Meunan keuh cara tajaga lidah
Beuroh taceugah dalam buet jahe
Hudep lam aman neubri le Allah
Hudep baraqah dalam ngon lahe
Si bungong mawoe meuwarna mirah
Si bungong lawah hitam bak tangke
Haba ka abeh lon tulak kisah
Beurayeuk meu’ah rakan bohate
Banda Aceh, 8 Agustus 2024